RSS

Category Archives: પદ

કાનજી તારી મા કે’શે

કાનજી તારી મા કે’શે પણ અમે કાનુડો કે’શું રે !
એટલું કે’તા નહીં માનો તો ગોકુળ મે’લી દેશું રે. કાનજી તારી o

માખણ ખાતાં નો’તું આવડતું મુખ હતું તારૂં એંઠુ રે !
ગોપીઓએ તારું ઘર ઘેરાણું જઈ ખૂણામાં બેઠું રે. કાનજી તારી o

ઝુલણી પે’રતાં નો’તું આવડતું અમે તે દિ’ પે’રાવતાં રે !
ભરવાડોની ગાળ્યું ખાતો અમે તે દિ’ છોડાવતાં રે. કાનજી તારી o

કાલો ઘેલો તારા માત-પિતાનો અમને શેના કોડ રે !
કર્મ સંજોગે આવી ભરાણા આંગણાં જોડાજોડ રે. કાનજી તારી o

ઘૂંટણીયાભેર હાલતો ચાલતો બોલતો કાલું ઘેલું રે !
ભલે મળ્યા મે’તા નરસૈંના સ્વામી પ્રેમભક્તિમાં રે’લું રે. કાનજી તારી o

-નરસિંહ મહેતા

Advertisements
 
Leave a comment

Posted by on 10/09/2009 in પદ

 

ટૅગ્સ:

ગોકુલ વહેલા પધારજો

ગોકુલ વહેલા પધારજો રે ;
મથુરા જાવ તો મારા સમ હો લાલ. ગોકુલ…

રથ જોડીને અક્રૂર આવિયા રે ;
એ તો મને દુખડાંના દેનાર હો લાલ. ગોકુલ…

ઓ જાય, ઓ જાય, રથ મારા નાથનો રે ;
માંહે બેઠા હળધર વીર હો લાલ. ગોકુલ…

આગળ રાધાજી ઊભાં રહ્યાં રે ;
માર હ્રદિયા પર રથ ખેડ હો લાલ. ગોકુલ…

મહેતા નરસિંહનો સ્વામી શામળો રે ;
વહાલે મારે રમાડ્યા છે રાસ હો લાલ. ગોકુલ…

 
Leave a comment

Posted by on 10/09/2009 in પદ

 

ટૅગ્સ:

જે ગમે જગદ ગુરુ દેવ જગદીશને

જે ગમે જગદ ગુરુ દેવ જગદીશને,
તે તણો ખરખરો ફોક કરવો;
આપણો ચિંતવ્યો અર્થ કંઈ નવ સરે,
ઊગરે એક ઉદ્વેગ ધરવો….
જે ગમે જગદ ગુરુ દેવ જગદીશને,

હું કરું, હું કરું, એ જ અજ્ઞાનતા,
શકટનો ભાર જેમ શ્વાન તાણે;
સૃષ્ટિ મંડાણ છે સર્વ એણી પેરે,
જોગી જોગેશ્વરા કો’ક જાણે…..
જે ગમે જગદ ગુરુ દેવ જગદીશને,

નીપજે નરથી તો કોઈ ના રહે દુઃખી,
શત્રુ મારીને સૌ મિત્ર રાખે;
રાય ને રંક કોઈ દૃષ્ટે આવે નહીં,
ભવન પર ભવન પર છત્ર દાખે….
જે ગમે જગદ ગુરુ દેવ જગદીશને,

ઋતુ લતા પત્ર ફળ ફૂલ આપે યથા,
માનવી મૂર્ખ મન વ્યર્થ શોચે;
જેહના ભાગ્યમાં જે સમે જે લખ્યું,
તેહને તે સમે તે જ પહોંચે….
જે ગમે જગદ ગુરુ દેવ જગદીશને,

ગ્રંથ ગરબડ કરી વાત ન કરી ખરી,
જેહને જે ગમે તેને પૂજે;
મન કર્મ વચનથી આપ માની લહે,
સત્ય છે એ જ મન એમ સુઝે….
જે ગમે જગદ ગુરુ દેવ જગદીશને,

સુખ સંસારી મિથ્યા કરી માનજો,
કૃષ્ણ વિના બીજું સર્વ કાચું;
જુગલ કર જોડી કરી નરસૈંયો એમ કહે,
જન્મ પ્રતિ જન્મ હરિ ને જ જાચું….
જે ગમે જગદ ગુરુ દેવ જગદીશને
-નરસિંહ મહેતા

 
Leave a comment

Posted by on 07/09/2009 in પદ

 

ટૅગ્સ: